बारामती दि . 10 (प्रतिनिधी): बारामती शहरातील फलटण चौक येथे आज दुपारी झालेल्या भीषण अपघातात 70 वर्षीय वृद्धाचा मृत्यू झाला आहे. या प्रकरणी हायवा टिपर चालकाविरुद्ध बारामती शहर पोलीस स्टेशनमध्ये गुन्हा दाखल करण्यात आला आहे.
फिर्यादी सतीश मारुती पारसे (वय 38, व्यवसाय-फॅब्रीकेशन, रा. आनंदनगर, गवारे फाटा, फलटण रोड, बारामती) यांनी दिलेल्या माहितीनुसार, त्यांचे वडील मारुती उमाजी पारसे (वय 70) हे आज दुपारी साधारण 12.20 वाजता फलटण चौक ते कसबा जाणाऱ्या रस्त्यावर सायकल हाताने धरून चालत जात होते.
यावेळी मागून येणाऱ्या टाटा हायवा टिपर (क्रमांक MH 12 SX 4750) चालक राजनारायण बलजीत सिंह (वय 45, रा. चवदौर चकडौर, सीधी, मध्यप्रदेश) याने भरधाव व बेफिकीरपणे वाहन चालवून पारसे यांना जोराची धडक दिली. या धडकेत पारसे गंभीर जखमी झाले व घटनास्थळीच मृत्यू झाला.
या घटनेबाबत बारामती शहर पोलीस ठाण्यात गु.र.नं. 350/2025, BNS कलम 81, 106(1), 125(a), 125(b), 324(4), तसेच मोबाकाक 184 अंतर्गत गुन्हा दाखल करण्यात आला आहे. घटनेची नोंद स्टेशन डायरी क्र. 049/2025 मध्ये सायं. 4.53 वाजता करण्यात आली.
या प्रकरणाचा तपास पो.हवा. करे (ब.नं. 2452) यांच्या कडे सोपविण्यात आला असून, दाखल अंमलदार पो.हवा. पवार (ब.नं. 2025) यांनी पुढील कारवाई सुरू केली आहे.
