बारामती दि.२५ (प्रतिनिधी ) बारामती तालुका पोलिसांनी गुप्त माहितीच्या आधारे मोठी कारवाई करत तब्बल ५० लाखांच्या एम.डी. ड्रग्स प्रकरणातील फरार आरोपीला अटक केली आहे.
पोलिस निरीक्षक चंद्रशेखर यादव यांनी दिलेल्या माहितीनुसार, तुळींज पोलीस ठाणे (नालासोपारा पूर्व), मीरा-भाईंदर वसई-विरार आयुक्तालय हद्दीत १४ सप्टेंबर रोजी एनडीपीएस कायदा १९८५ अंतर्गत गुन्हा दाखल करण्यात आला होता.
या प्रकरणातील आरोपींमध्ये शहबाज हमीद शेख, योगेश राजू राठोड, जफर आसिफ शेख, बाबू शेख आणि समीर उर्फ नूर मोहम्मद अस्लम शेख (वय २०, रा. वसई) यांचा समावेश होता.
यापैकी समीर शेख हा फरार होता. तो बारामतीत असल्याची माहिती वसई-विरार पोलिसांकडून बारामती तालुका पोलिसांना मिळाली. त्यानुसार पोलिसांनी शोधमोहीम राबवून, आरोपी ‘ब्रँड रिव्हर’ या कपड्याच्या दुकानात काम करत असल्याची खात्रीशीर माहिती मिळाल्यानंतर, हुशारीने आखलेल्या योजनेतून त्याला अटक केली.
चौकशीत आरोपीने तुळींज पोलीस ठाण्यातील गुन्ह्यातील फरार आरोपी असल्याची कबुली दिली. त्यानंतर वसई-विरार आयुक्तालयाच्या पोलिसांना माहिती देऊन आरोपीस पुढील तपासासाठी त्यांच्या ताब्यात देण्यात आले.
ही कारवाई पोलीस अधीक्षक संदीपसिंह गिल, अप्पर पोलीस अधीक्षक गणेश बिराजदार, उपविभागीय अधिकारी सुदर्शन राठोड यांच्या मार्गदर्शनाखाली पोलीस निरीक्षक चंद्रशेखर यादव, स.पो.नि. विक्रम पवार, सहाय्यक फौजदार सुरेंद्र वाघ, सुरेश बडे आणि पोलीस अंमलदार निलेश वाकळे, राहुल लांडगे यांच्या पथकाने केली.
आरोपीस तुळींज पोलीस ठाण्याचे उपनिरीक्षक राख, हवालदार कांबळे आणि कॉन्स्टेबल सोनवणे यांच्या ताब्यात सुपूर्द करण्यात आले आहे.
