बारामती दि .30 (प्रतिनिधी) माळेगाव बु।। ता. बारामती जि. पुणे येथे शारदानगर बारामती-निरा रोडवरील पुलाजवळ शनिवारी सकाळी झालेल्या भीषण अपघातात वडिलांचा मृत्यू झाला तर मुलगी गंभीर जखमी झाली आहे. या अपघातात दुचाकीचेही मोठे नुकसान झाले. धडक दिल्यानंतर एस.टी. बसचालक घटनास्थळावरून पसार झाला.
दि. 30 ऑगस्ट 2025 रोजी सकाळी 6.45 च्या सुमारास फिर्यादी योगेशकुमार राजेंद्र भागवत (रा. गोखळी, ता. फलटण, जि. सातारा) यांचे वडील राजेंद्र दिनकर भागवत हे मुलगी स्वरा हिला घेऊन दुचाकी (क्र. एम.एच.11 बी.क्यु. 8941) वरून रस्ता क्रॉस करीत होते. त्यावेळी बारामतीकडून निराकडे जाणारी एस.टी. बस (क्र. एम.एच.14 बी.टी. 4790) भरधाव वेगात आली. चालक सचिन प्रल्हाद पवार (वय 39, रा. हिंगणेवाडी, ता. इंदापूर, जि. पुणे) याने निष्काळजीपणे वाहन चालवत दुचाकीला जोरदार धडक दिली.
अपघातात राजेंद्र दिनकर भागवत यांचा जागीच मृत्यू झाला तर मुलगी स्वरा गंभीर जखमी झाली. दुचाकीचे मोठे नुकसान झाले. अपघातानंतर बसचालक घटनास्थळावरून निघून गेला.
या प्रकरणी माळेगाव पोलीस स्टेशन गु.र.नं. 227/2025 अंतर्गत बी.एन.एस. कलम 106(1), 281, 125(अ), 125(ब), 324(4) तसेच मोटार वाहन कायदा कलम 184, 134, 177 प्रमाणे गुन्हा दाखल करण्यात आला आहे. तपास पोहवा सादिक सय्यद (ब नं. 2213) यांच्या मार्गदर्शनाखाली सुरू आहे.
