जळगाव (लक्षवेध न्युज नेटवर्क ) दि . 6 आषाढी एकादशीच्या पावन पर्वावर मानव सेवा विद्यालयाचे कलाशिक्षक, उपक्रमशील शिक्षक, तसेच अत्यंत प्रतिभावान चित्रकार सुनिल दाभाडे यांनी एका अनोख्या आणि अप्रतिम पद्धतीने वारी साजरी केली आहे. या वर्षी त्यांनी “मोर पिसावर” रंगांच्या साहाय्याने विठूरायाचे सुंदर चित्र रेखाटून सणाला एक नवीन अर्थ दिला आहे. ही क्रांतिकारी कलात्मकता पाहून सर्वत्र त्यांचे कौतुक होत आहे.
सुनिल दाभाडे यांनी केवळ १५ मिनिटांत मोर पिसावर विठूमाऊलीचे चित्र साकारले, जे त्यांच्या अद्भुत कौशल्याचे दिपस्तंभ ठरले आहे. ही कला केवळ रंगवलेली नाही तर तिच्यामागे एक सांस्कृतिक महत्त्व आणि श्रद्धा देखील आहे. गेल्या काही काळात त्यांनी ज्वारीच्या भाकरीवर, पिंपळाच्या पानावर, तुळशीच्या पानांवर तसेच विटेवर विठूमाऊलीचे चित्र साकारले आहे. याशिवाय, ११११ शब्दांपासून त्यांनी विश्वस्तरीय महान व्यक्ती डॉ. बाबासाहेब आंबेडकर यांचे देखील सुरेख चित्र रेखाटले आहे. या चित्राला वर्ल्ड रेकॉर्ड, लंडन व ओ.एम.जी नॅशनल बुक ऑफ रेकॉर्ड्स मध्ये सन्मानाने मान्यता प्राप्त झाली आहे.
सुनिल दाभाडे यांचा हा प्रयत्न संस्कृती आणि कलेचा अनोखा संगम सिद्ध करतो, जो समाजात कलात्मकता आणि श्रद्धेचा नवा संदेश देतो. विटेवरील पेटिंगसुद्धा पंढरपूरच्या मंदिरात जाऊन भक्तांना दर्शन घेण्याची संधी मिळाली आहे, ज्यामुळे या अनोख्या पण पारंपरिक कलेची प्रसिद्धी अधिक वाढली आहे.
आषाढी एकादशीच्या शुभ प्रसंगी सुनिल दाभाडे यांच्याबरोबरच अनेक कलाकारांनी आपली अनोखी कला आणि श्रद्धा लोकांसमोर सादर केली आहे. मोर पिसवर विठूरायाचे चित्र साकारण्याचा हा प्रयोग केवळ कला नाही तर आस्था आणि संस्कृतीचा नवा अध्याय आहे. अशा अनोख्या चित्रकारांच्या प्रयत्नांनी आषाढी एकादशीचा सण अधिक उल्लेखनीय आणि संस्मरणीय ठरला आहे.
