रावेर दि . 11 (प्रतिनिधी) : तालुक्यातील अटवाडे येथे सुरू असलेल्या पशुवैद्यकीय दवाखान्याच्या इमारतीच्या बांधकामावर तात्काळ स्थगिती देण्याची मागणी ग्रामपंचायत सदस्य गोकूळ भाऊराव करवले यांनी केली आहे. याबाबत त्यांनी गटविकास अधिकारी, पंचायत समिती रावेर यांना लेखी अर्ज दिला आहे. परंतु गटविकास अधिकारी यांनी तक्रारीची अद्याप पर्यंत दखल घेतलेली नाही .
अटवाडे येथे पशुवैद्यकीय दवाखान्याचे बांधकाम सध्या लेंटर लेव्हलपर्यंत पूर्ण झाले असून स्लॅब टाकण्याचे काम बाकी आहे. मात्र या बांधकामासाठी शासनाकडून किती निधी मंजूर झाला आहे, काम पूर्ण करण्यासाठी किती कालावधी निश्चित आहे तसेच बांधकामाच्या इस्टिमेटमध्ये कोणत्या बाबींचा समावेश आहे याबाबत ग्रामपंचायत कडे कोणती ही माहिती उपलब्ध नसल्याचे गोकुळ करवले यांनी अर्जात नमूद केले आहे.
तसेच प्रत्यक्ष पाहणी दरम्यान बांधकामासाठी वापरले जाणारे सिमेंट, वाळू, गिट्टी व इतर साहित्य निकृष्ट दर्जाचे असल्याची शंका निर्माण होत असल्याचेही त्यांनी म्हटले आहे. या संदर्भात ठेकेदाराकडे साहित्याच्या चाचणी अहवालाबाबत विचारणा केली असता समाधानकारक माहिती मिळालेली नसल्याचेही त्यांनी नमूद केले आहे.
सदर बांधकामाच्या गुणवत्तेबाबत शंका असल्याने तांत्रिक तपासणी होई पर्यंत काम तात्काळ थांबविण्यात यावे, अशी मागणी त्यांनी केली आहे. या बाबतची प्रत जिल्हा परिषद जळगाव येथील मुख्य कार्यकारी अधिकारी तसेच जिल्हा ग्रामीण विकास यंत्रणा (DRDA) यांना ही पाठविण्यात आली आहे.
