रावेर दि .16 (लक्षवेध न्युज नेटवर्क ) रावेर तालुक्यातील विटवा,धामोडी पाठोपाठ कांडवेल, विवरा बु येथेही लाभार्थी यांचेकडे जागा नसतांना घरकुलाच्या लाभार्थ्यांना तत्कालीन बीडीओ के.पी.वानखेडे यांनी प्रथम हप्ता वितरित केल्याचे दिसून येत आहे, काल बातमी प्रसिद्ध होताच विस्तार अधिकारी युवराज अढागळे यांचे नेतृत्वाखाली घरकुल विभागाची टीम आज विटवा गावात पोहचल्याचे वृत्त आहे. जवळपास २५ लाभार्थ्यांकडून प्रथम हप्ता वसूल करण्याची कार्यवाही करण्यात येणार आहे.तसेच १५ लाभार्थी यांनी एक लाखाहून अधिक अनुदान लाटल्याचे प्राथमिक चौकशीत आढळून आले आहे.नवल म्हणजे या सर्व लाभार्थ्यांकडे स्वतः ची जागाच नाही.
पंचायत समितीचा घरकुल विभाग व तत्कालीन बीडीओ के.पी.वानखेडे या गैरप्रकारास जबाबदार आहेत.लाभार्थींकडे स्वतः ची जागा नसेल किंवा त्यांना शासनामार्फत जागा उपलब्ध करून देणे शक्य नसेल तर अशा लाभार्थ्यांना यादीतून वगळण्याच्या अतिरिक्त मुख्य सचिव यांच्या सूचना असतांना लाभार्थी यांची निवड झालीच कशी ? ग्रामपंचायत कार्यालयाने परिपूर्ण प्रस्ताव सादर न करताच बोगस लाभार्थ्यांना घरकुल विभागाकडून आनुदान वितरित कसे झाले? शौचालय घोटाळ्यासारखे पंचायत समितीत झारीतील शुक्राचार्य कोण आहेत? असे अनेक प्रश्न तालुकावासीयांना पडले आहेत.
