चाळीसगाव दि .25 (लक्षवेध न्युज नेटवर्क ) काल दि. २४ रोजी रात्री दहा वाजेच्या सुमारास महामार्गावरील पोलीस कन्नड घाटाखाली नाका बंदी करत असताना मोठी कारवाई केली, महामार्ग पोलिसांनी सुमारे ३९ किलो अमली पदार्थ (ड्रग्ज) जप्त केले असून, त्याची अंदाजे किंमत ६० कोटी रुपये असल्याचे समजते. ही कारवाई पीएसआय शशिकांत पाटील यांच्या नेतृत्वाखाली करण्यात आली. अमली पदार्थ असलेली ब्रेझा गाडी दिल्ली येथून छत्रपती संभाजी नगर मार्गे बेंगळुरूकडे जात असल्याची गुप्त माहिती पोलिसांना मिळाली, या माहितीच्या आधारे ही धडक कारवाई करण्यात आली. रात्री उशिरापर्यंत तपास व पंचनाम्याचे काम सुरू होते. घटनास्थळी फॉरेन्सिक लॅबचे तज्ज्ञ पथक उपस्थित होते व सविस्तर तपासणी पोलिसांकडून केली जात होती. पोलिसांकडून या प्रकरणाचा सखोल तपास सुरू असून, गाडीमधील व्यक्ती व ड्रग्ज पुरवठा साखळीबाबत तपशील घेतले जात आहेत. महामार्ग पोलीस व स्थानिक प्रशासनाच्या सतर्कतेमुळे मोठ्या प्रमाणात अमली पदार्थांचा साठा पकडण्यात आल्याने संभाव्य समाजविघातक घडामोडी रोखल्या गेल्या आहेत, काही महिन्यांपुर्वीच जिल्ह्यात ड्रग्ज् व केटामाईनचे प्रकरण समोर आले होते. याप्रकरणी पावसाळी अधिवेशनात पडसाद उमटले होते. त्यानंतर पुन्हा चाळीसगाव येथे ड्रग्ज्ची मोठी कारवाई झाल्यामुळे एकच खळबळ उडाली आहे.
