यावल दि 6 तालुका प्रतिनिधी ( मिलिंद जंजाळे ) यावल शहरातून दोन दिवसांपूर्वी रहस्यमयरीत्या बेपत्ता झालेल्या सहा वर्षीय चिमुकल्याचा मृतदेह शेजारच्याच घरात सापडल्याने संपूर्ण शहरात खळबळ उडाली आहे. या अमानुष व हृदय पिळवटून टाकणाऱ्या घटनेमुळे परिसरात तणावाचे वातावरण पसरले असून नागरिकांमध्ये प्रचंड संताप उसळला आहे.
मृत बालकाची ओळख
मृत मुलाचे नाव अब्दुल हन्नान मजित खान (वय ६, रा. बाबूजीपुरा, यावल) असे आहे. हा मुलगा एकुलता एक असून काही महिन्यांपूर्वी त्याच्या आईने वडिलांना आपली किडनी दान करून जीवनदान दिल्याची हृदयस्पर्शी बाब उघडकीस आली आहे. या कुटुंबावर आता दुर्दैवाचा डोंगर कोसळला आहे.
मृतदेह शेजाऱ्याच्या घरातून
मुलगा हरविल्यानंतर घरच्यांनी व नागरिकांनी शोधमोहीम सुरू केली होती. मात्र शनिवारी सकाळी शेजाऱ्याच्या बिस्मिल्लाह खलिफा यांच्या घरातून मुलाचा मृतदेह सापडला. या धक्कादायक प्रकारानंतर परिसरात तणावाचे वातावरण निर्माण झाले असून मोठ्या संख्येने नागरिक घटनास्थळी जमा झाले.
पोलिसांचा तपास व नागरिकांचा संताप
पोलिसांनी घटनास्थळी धाव घेऊन घर सील केले व मृतदेह शवविच्छेदनासाठी पाठवला. याप्रकरणी संशयित आरोपीवर विविध गंभीर कलमांखाली गुन्हा दाखल करण्यात आला असून त्याला कठोर शिक्षा देण्याची मागणी होत आहे.
शहरातील नागरिक संतप्त होत रस्त्यावर उतरले आहेत. “निष्पाप बालकाच्या हत्या प्रकरणी त्वरीत आरोपीला अटक करून कठोर शिक्षा द्यावी, अन्यथा जनआंदोलन छेडले जाईल,” असा इशारा संघटना व स्थानिक नागरिकांनी दिला आहे.
संघटनांचे निवेदन
या घटनेनंतर एकता संघटनेचे अध्यक्ष व कार्यकर्ते, मृत बालकाचे आजोबा तसेच मुस्लिम समाज कमिटीचे पदाधिकारी यांनी एकत्र येऊन पोलिस प्रशासनाला निवेदन दिले. हे निवेदन अप्पर पोलिस अधीक्षक नखाते, फैजपूर विभागीय पोलिस अधिकारी अनिल बडगुजर व यावल पोलिस निरीक्षक रंगनाथ धारबडे यांना देण्यात आले. यात आरोपीला तातडीने अटक करून कठोरात कठोर कारवाई करण्याची मागणी करण्यात आली.
शहरात शोककळा
घटनेमुळे शांतताप्रिय यावल शहरात प्रचंड खळबळ माजली आहे. प्रत्येकाच्या डोळ्यात हन्नानच्या अकाली मृत्यूबद्दल वेदना आणि संताप आहे. संपूर्ण शहरात हळहळ व्यक्त केली जात असून वातावरण शोकमग्न झाले आहे.
