यावल दि . 8 प्रतिनिधी ( मिलिंद जंजाळे ) यावल शहरातील सहा वर्षीय बालकाची निर्घृण हत्या झाल्याच्या घटनेने संपूर्ण शहरात संतापाची लाट उसळली आहे. या अमानुष कृत्याच्या निषेधार्थ आज यावल वासियांच्या वतीने भव्य मूक लॉंग मार्च काढण्यात आला.
या मूक मोर्चामध्ये हजारो नागरिकांनी शांततेने सहभाग घेतला. “बालकाच्या मारेकऱ्यांना कठोरात कठोर शिक्षा व्हावी”, “शहरातील नागरिकांच्या सुरक्षेसाठी कडक उपाययोजना करण्यात याव्यात” अशा ठळक मागण्या करण्यात आल्या.
मोर्चा शहरातील मुख्य मार्गाने होत तहसील कार्यालयावर जाऊन संपन्न झाला. यावेळी यावल तहसीलदार मोहनमाला नाझिरकर यांना नागरिकांच्या वतीने निवेदन देण्यात आले. या निवेदनात दोषींवर जलदगतीने गुन्हेगारी प्रक्रिया राबवून त्यांना कठोर शिक्षा व्हावी तसेच शहरात कायदा व सुव्यवस्था अबाधित राहण्यासाठी पोलिस गस्त वाढवावी, अशी मागणी करण्यात आली आहे.
या घटनेमुळे यावल शहरात तीव्र दुःख आणि संतापाचे वातावरण असून नागरिक न्यायाची आतुरतेने वाट पाहत आहेत.
