मुक्ताईनगर दि . 7 (प्रतिनिधी ) मुक्ताईनगर सिव्हिल सोसायटीच्या स्वच्छता व समाजकल्याणकारी कार्याची दखल घेत श्री सर्व समाज विशाल गणेश मंडळांच्या कार्यकर्त्यांनी गणपती बाप्पाचा फोटो देऊन त्यांचा सत्कार केला. या प्रसंगी मंडळाचे अध्यक्ष रुपेश सोनार, उपाध्यक्ष अनिकेत तळेले, तसेच जेष्ठ कार्यकर्ते अशोक जी बोराखेडे, नितीन जैन, अतुल जावरे, नरेंद्र सापधरे सर, योगेश मनसुटे व इतर ग्रामस्थ, महिला वर्ग आणि बालक मोठय़ा संख्येने उपस्थित होते.
या सहकार्याच्या कार्यक्रमात निर्माल्य स्वच्छतेसाठी 20 ट्रॉलीचा वापर करण्यात आला. सकाळी 7 वाजल्यापासून दुपारी 12 वाजेपर्यंत हा स्वच्छता अभियान व्यापक प्रमाणावर राबविण्यात आला. या मोहिमेत 41 सिव्हिल सोसायटी सदस्यांनी सक्रीय सहभाग नोंदवून एकात्मतेची उत्कृष्ट झलक दिली.
श्री सर्व समाज विशाल गणेश मंडळाच्या कार्यकर्त्यांनी नदीचे पवित्र पात्र स्वच्छ ठेवण्याच्या महत्त्वावर विशेष भर दिला. विविध ठिकाणी बॅनर आणि साऊंड सिस्टीमच्या माध्यमातून गणेश भक्तांना नदीची स्वच्छता राखण्यासाठी नम्र विनंती करण्यात आली. यामुळे परिसरातील ग्रामस्थांमध्ये पर्यावरणजागृती वाढीस लागल्याचे दिसून आले.
मुक्ताईनगर सिव्हिल सोसायटीच्या सामाजिक कार्याची महती
मुक्ताईनगर सिव्हिल सोसायटीने स्वच्छता, पर्यावरण संरक्षण आणि समाजसेवेच्या क्षेत्रात सातत्याने उल्लेखनीय कार्य केले आहे. यामुळेच स्थानिक समाजातून त्यांना विशेष मान्यता मिळाली आहे. गणेश उत्सवाच्या पूर्वसंध्येला अशा प्रकारच्या स्वच्छता अभियानांनी उत्सवाची धार्मिकता वाढवली असून, या उपक्रमातून भक्तांची जबाबदारीही अधोरेखित झाली आहे.
श्री सर्व समाज विशाल गणेश मंडळ आणि मुक्ताईनगर सिव्हिल सोसायटी यांच्या सामूहिक प्रयत्नांनी गणेशोत्सव साजरा करण्याचा अनुभव अधिक सुंदर आणि पर्यावरणपू्र्ण बनला आहे. सामाजिक समजुतीसाठी आणि सार्वजनिक आरोग्यासाठी अशा सहकार्यांच्या उपक्रमांना पुढील काळातही चालना देण्याची गरज आहे.
