यावल दि .10 तालुका प्रतिनिधी ( मिलिंद जंजाळे ) यावल शहरात घडलेल्या सहा वर्षीय बालकाच्या खून प्रकरणात आता धक्कादायक बाब उघडकीस आली आहे. बालकाची हत्या करण्यापूर्वी त्याच्यावर लैंगिक अत्याचार झाल्याचे निष्पन्न झाले असून, या गुन्ह्यात आता पोस्को कलमाची वाढ करण्यात आली आहे.
दि. 5 सप्टेंबर रोजी बाबुजीपुरा भागातील सहा वर्षीय मुलगा बेपत्ता झाला होता. ईद-ए-मिलादच्या सणादिवशी घडलेल्या या घटनेमुळे परिसरात शोककळा पसरली होती. दुसऱ्याच दिवशी, दि. 6 सप्टेंबर रोजी, बालकाचा मृतदेह शेजारी राहणाऱ्या संशयित शेख शाहिद शेख बिस्मिल्ला (वय 22) यांच्या घरात जळालेल्या अवस्थेत आढळून आला.
मयताच्या आजोबांच्या फिर्यादीवरून सुरुवातीला खुनाचा गुन्हा दाखल करण्यात आला होता. मात्र, तपासादरम्यान आरोपीने कोठडीत चौकशीदरम्यान धक्कादायक कबुली दिली असून, बालकावर अनैसर्गिक लैंगिक अत्याचार करून खून केल्याचे स्पष्ट झाले आहे.
याप्रकरणी आरोपी शाहिदला न्यायालयाने 8 दिवसांची पोलीस कोठडी सुनावली असून, चौकशीदरम्यान तो “पोपटासारखा” कबुलीजबाब देत असल्याची माहिती सूत्रांकडून मिळत आहे.
संपूर्ण प्रकरणाचा पुढील तपास पोलीस निरीक्षक रंगनाथ धारबळे यांच्या मार्गदर्शनाखाली पोलीस उपनिरीक्षक मसलोद्दीन शेख हे करीत आहेत. परिसरात अजून कोणी आरोपींचा सहभाग आहे का, याकडे नागरिकांसह प्रशासनाचेही लक्ष लागले आहे.
या निर्घृण हत्येमुळे यावल शहरात संताप आणि भीतीचे वातावरण पसरले असून, नागरिकांनी या प्रकरणात गुन्हेगाराला कठोरात कठोर शिक्षा देण्याची मागणी केली आहे.
