बारामती दि.०१ (प्रतिनिधी ) जळगाव क.प. मोरगाव या बारामती रोडलगत असलेल्या काही नामांकित हॉटेल्समध्ये खुलेआम सर्रासपणे अवैधरित्या दारू विक्री केली जात असून, प्रशासन मात्र गप्प बसले आहे. नागरिकांकडून वारंवार तक्रारी, फोटो, व्हिडीओ आणि ठोस माहिती देऊनही पोलिसांनी अद्याप कोणतीही ठोस कारवाई केली नाही.
या प्रकारामुळे स्थानिक जनतेत तीव्र नाराजी आहे. काही सामाजिक कार्यकर्त्यांनी तर थेट पोलिस प्रशासन आणि हॉटेल चालकांमधील “साटेलोटा” असल्याचा आरोप केला आहे. कायद्याच्या थेट उल्लंघनाचा प्रकार खुलेआम सुरू असताना कारवाई न होणं ही बाब संशयास्पद आहे.
माहिती मिळाली तरी कारवाई नाही –नागरिक हैराण दारूबंदी कायदा फक्त कागदावर उरला आहे का?”
हा प्रकार बघून तर पोलीसच या धंद्याचे संरक्षण करतायत की काय असं वाटतं.”अशा प्रतिक्रिया संतप्त नागरिकांकडून उमटत आहेत.
कायदा-सुव्यवस्थेवर प्रश्नचिन्ह
रोजंदारीने काम करणारे तरुण, प्रवासी आणि ट्रक चालक ही या हॉटेल्सची मुख्य ग्राहक मंडळी. रात्री उशिरापर्यंत सुरू असलेला दारूचा हा अवैध व्यवहार कायदा-सुव्यवस्थेच्या दृष्टीने गंभीर असून, त्यामुळे अपघात, वाद-विवाद व गुन्हेगारी प्रकार वाढण्याची शक्यता आहे.
प्रशासनाकडे मागणी – तत्काळ कारवाई करा
स्थानिक ग्रामस्थ, सामाजिक संस्था आणि जनप्रतिनिधींनी प्रशासनाकडे मागणी केली आहे की, संबंधित हॉटेल्सवर तात्काळ छापे टाकून परवान्याशिवाय दारू विकणाऱ्यांवर गुन्हे दाखल करावेत. अन्यथा जनआंदोलन छेडण्याचा इशाराही देण्यात आला आहे.
