यावल दि .३ तालुका प्रतिनिधी ( मिलिंद जंजाळे ) यावल तालुक्यातील किनगाव येथील ग्रामीण रुग्णालयाचे बांधकाम पुर्ण होवून ही लोकार्पण का होत नाही यामुळे परिसरातीत ग्रामस्थांमध्ये तीव्र नाराजी व्यक्त होत आहे.
या रुग्णालयासाठी उत्कृष्ट व सुसज्ज इमारत उभारण्यात आली असून, आवश्यक त्या पदांवर कर्मचारी भरती देखील झालेली आहे. मात्र सर्व सुविधा उपलब्ध असून सुद्धा ग्रामीण रुग्णालय बंद अवस्थेत आहे.
ग्रामीण भागातील शेकडो नागरिकांना किरकोळ आजारापासून ते गंभीर उपचारांसाठी यावल, भुसावळ किंवा जळगाव जावे लागते. त्यामुळे प्रवासासाठी होणारा विलंब व खर्च नागरिकांना जाचक ठरत आहे. अनेक वेळा अपघातग्रस्त वा गंभीर रुग्णांना तातडीची वैद्यकीय मदत मिळण्यात विलंब होतो आणि त्यामुळे जीव धोक्यात येण्याची शक्यता वाढते.
स्थानिक आमदार व लोकप्रतिनिधींनी या प्रश्नाकडे गंभीरपणे लक्ष न दिल्याबद्दल ग्रामस्थांतून संताप व्यक्त केला जात आहे. मंजूर झालेले ग्रामीण रुग्णालय सुरु न होणे ही प्रशासनाची व लोकप्रतिनिधींची मोठी उदासीनता असल्याचे नागरिकांचे म्हणणे आहे.
आरोग्य प्रशासनाने याकडे लक्ष केंद्रित करून लवकरात लवकर ठोस निर्णय घेऊन रुग्णालयाचे लोकार्पण करावे, अशी मागणी केली जात आहे. किनगाव येथिल ग्रामीण रुग्णालय सुरु न झाल्यास नागरीकांनी तिव्र आंदोलनाचा इशारा दिला आहे .
